Musiek in my ore Woensdag humor

In elkeen van ons, wel ek dink die meeste van ons is daar ‘n musikant wat wil ontdek word.

Wie sing dan nou nie in die stort nie, of loop soms en neurie ‘n deuntjie nie?

Ou Bloedbek is geen uitsondering nie, maar laat ek darem nou eers die storie terugvat, ver terug….

Kyk ou Bloedbek moes ‘n musiek talent ontvang het, Oupa was ‘n vioolspeler. Ek onthou nog die dae van die vakansies by Dwarskersbos waar die manne met kitaar, viool en konsertina musiek gemaak het en die groot mense gedans het dat die stof so staan. Pa kon sing, hy het selfs ‘n plaat laat sny in ‘n kiosk iewers in Johannesburg, dis nou lank terug, want die plaat het nog op ‘n grammefoon gewerk. Ek dink dis mos genoeg gene om aan ou Bloedbek deur te gee, of nie?

My eerste ontmoeting met my eie kitaar was toe ek skaar kon loop, het so stillitjies saam met ou Elvis my kitaar geslaan terwyl die grootmense rock and roll. Dit was die tyd toe die grootmense nog partie gehou het en dan was daar altyd die Beatles en Elvis wat hulle voete laat heuk het. Elke geleentheid was ‘n rede om te kan dans, twist en rock en roll. Die sestigs en sewentiger jare was lekker jare.

My tweede kitaar het ek as tiener aangeskaf, ‘n desent kitaar, maar toe daag Johan op met sy 12snaar en ek kwyl, maar ek oefen, het selfs ‘n manual gehad. Johan help kliphard leer, want hy kan. Ou Bloedbek leer ‘n paar drukke, maar eina, die wysies klink nie naastenby soos dit moet nie, ek en my kitaar word selfs die huis belet en so land daardie kitaar iewers in ‘n pawnshop, geruil vir ‘n trompie en ‘n bekfluit. Selfs dit wil nie reg klink nie.

Die jare loop aan en Bloedbek het ‘n laaitie en hy wil ook leer kitaar speel. So skaf Bloedbek twee kitare aan een vir Bloedbek junior en een vir homselwers. Dalk het daardie musiek geen darem nou sy verskyning gemaak en daar word begin om kitaar te speel. Ons verwilder die honne en katte, vervreemd ons geliefdes, want sien ou Bloedbek se vrou en twee dogters speel klavier, omdat hulle kan en skierlik het hulle kompetisie sien. Dit gaan woes in Bloedbek se huis. Liefie is lekker moerig oor al die lawaai en die twee bloedbekke, dis nou ekke en Bloedbek junior besluit ons gaan kitaar lesse neem. Daar word dit dan ook gereel en die fooie word betaal. Bloedbek en Christine, dis nou my persoonlike musiek tutor, begin die eerste dag van die nuwe kwartaal, sy is verheug want sy het twee nuwe studente om die musiek bedryf in te stuur. Bloedbek is die bliksem in want hy betaal duur vir die lesse, maar Bloedbek Junior sien jy nooit oefen nie, terwyl ou Bloedbek die lesse baie ernstig opneem en soos klokslag elke dag oefen. Liefie is nou eers moerig, want alles in haar huishouding staan stil, die gras word lank die bome verdroog, want Bloedbek leer kitaar.

Week na week gaan verby en weke word ‘n maand, maar die klanke uit Bloedbek se kitaar klink siek man, siek seg ek jou. Uit die hoek van my oog kon ek ook sien my musiek tutor se opgewondenheid het verander in wanhoop. Sy is baie tevrede met Bloedbek junior se vordering, want sien sy moet terugvoering gee, ek betaal mos. Ek verstaan nie, want ek sien die klein bliksem nooit oefen nie.

Die einde van die kwartaal breek aan en Christine, my tutor, wag my in met ‘n anderste kyk in haar oog, terwyl ek steeds hoopvol is vir ‘n loopbaan as kitaar speler in die musiek bedryf, Hel man, daar is nie ‘n druk wat ek nie ken nie, A<B<C<D<E<F<G<H<I<J<K, ek ken die lot man uit my kop uit seg ek jou. Christinne het ander planne, geld is darem nie alles in die lewe nie. Sy seg ons het ‘n belangrike besluit om te neem: Sy stel voor ek gaan nou eers die volgende kwartaal by die huis oefen en as ek daarna gereed is sal sy my weer begin afrig. Haar laaste woorde aan my was “Hou net so aan dit sal beter word, oefen gereeld, jy het talent”, kak man dit was net haar manier om op ‘n baie diplomatiese manier te seg, “voertsek”. Christinne was goed hoor, want as sy my met ons laaste gesprek sou afraai om naby ‘n kitaar te kom, sou ek waarskynlik ‘n sielkundige letsel oorgehou het.

Dit neem my ‘n kwartaal om weer Liefie se plek in ‘n leefbare ruimte te omskep. Ek sien moord gedagtes in Liefie se oge as dit lyk ek wil my kitaar optel en ek raak self huiwerig, want Bloedbek junior, die klein bliksem speel al “The house of the Rising Sun” asof hy die lied self geskryf het en dis een van die eerste liedjies wat ‘n kitaar speler kan speel, behalwe ekke. My rendisie van die lied klink soos ‘n oorlog opmars, met die ondertone van ‘n Anton Goosen wat ‘n Jimmy Hendrix probeer namaak, dit maak die honne en katte siek, selfs die budgie ly nou aan depressie.

Bloedbek junior het nou twee kitare en ou bloedbek, wel hy hou hom maar besig met die CD speler. Ek sing darem nog in die stort, maar weier volstrek om na “The House of the rising sun” te luister.

Maybee moet ek die bongo drom leer speel…

Bloedbek junior en sy orkes op skool, hy is die ene links

Bloedbek junior en sy orkes op skool, hy is die ene links

Woensdag groete en hou die wiele oppie teer, betaal jou EToll, of loss dit ook maar.

Seg ou Bloedbek

 

 

7 Dinge wat ons veiligheid benadeel.

Ek gaan voort met die reeks oor  sekuriteit teen misdaad.

As dit die eerste keer is wat jy hieroor val, gaan lees maar gerus my vorige plasings oor misdaad, geweld, aanvalle ens. Indien jy dink jy is te slim en ken alles, lewer  dan ‘n kommentaar en maak ‘n bydrae, of moenie jou tyd hier mors nie, gaan drink eerder nog ‘n koppie koffie, of gaan doen dan eerder iets konstruktiefs man.

Stap 1. Paraatheid

Eerder die gebrek aan paraatheid. Daar word baie hieroor gepraat en steeds is ons nie. Misdadigers soek ‘n maklike prooi en teiken juis mense wat dit die minste verwag. Elke misdaad word beplan. Moenie dat jy die volgende maklike teiken word net omdat jy aanneem dit sal nie met jou gebeur nie.

‘n Persoon wat gereeld op plase kom, vertel my hoe agterlosig mense is. Dit gebeur gereeld dat hy by ‘n plaaswerf kom waar daar nie ‘n mens of dier in sig is nie. Huisdeure staan oop. Werkskamers en stoorkamers se deure staan oop. Dit lyk asof mense die boosdoeners wil uitnooi.

Maak paraatheid ‘n deel van jou lewe, leef dit, beoefen dit. “Practice makes perfect” 

Stap 2. Tekens

Ek self het nog nooit enige van die tekens gesien nie, maar ‘n polisieman vertel my dis ‘n feit. Dit gebeur wel. Daar is baie inligting rondom die tekens wat misdadigers gebruik wanneer ‘n misdaad beplan word. Daar is baie inligting op die web en ek gaan nie in diepte daarop ingaan nie. Gaan Google dit gerus en raak bewus daarvan.

Wees ten minste bewus van dit hoe misdadigers hulle self voorberei.

Stap 3. Vreemdes

Ken jou omgewing en sy mense. Op die platteland ken almal vir almal. Hier is dit makliker om vreemdes op te merk, maar weereens as jy nie oplet wat rondom jou aangaan nie, is jy reeds ‘n teiken. Moenie huiwer om ‘n vreemde te nader en ‘n gesprek aan te knoop om uit te vind wie is hy/sy, waar kom hulle vandaan, waarheen is hulle op pad. Moet nou net nie die persoon konfronteer nie, dan gaan jy ‘n bloutjie loop. Vriendellikheid kos niks. Waarsku ook maar vir die bure. Daardeur kan jy ‘n potensiele misdaad voorkom.

Beskerm jouself teen moontlike indringers, maar beskerm ook jou buurt!

 

Stap 4. Werknemers

Hoeveel keer al is daar nie gevalle dat werknemers betrokke is by ‘n misdaad nie?

Ken jy jou werkernemers se agtergrond, weet jy waar hy/sy woon. Het jy ‘n foto van die persone in diens, selfs tydelike werkers. Ek neem altyd ‘n foto van nuwe arbeiders. Die sielkundige waarde van ‘n foto help baie, want nou weet die werker hy/sy kan maklik geidentifiseer word. Neem dit ‘n stap verder en maak sommer vinger afdrukke ook. Met vandag se selfone is dit soveel makliker om dit te doen. Dit skep ook die indruk van parate optrede.

Moenie enigeen sommer van die straat af kry vir take nie, werk eerder op verwysings.

Die makste honde byt die seerste. Werknemers wat lank in diens is kan maklik die pad byster raak, of selfs teen hulle wil betrokke raak by misdaad beplanning teen jou en of jou gesin. Ken jou werker en dit sal makliker wees om ‘n verandering in hulle gedrag op te merk.

Beter nog, doen jou eie werk, as die Amerikaners sonder hulp kan klaarkom, ons kan dit beter doen, of wat seg ou Bloedbek nou?

Stap 5. Roetine

Dit is ‘n baie maklike aanduiding vir ‘n misdadiger  of  jy ‘n maklike of moeilike teiken gaan wees.

As jy altyd dieselfde roetine volg, is dit ‘n “dead give away”. Waar daar slegs enkele persone in ‘n huis woon en dieselfde ligte brand elke aand, weet Ta waar die mense in die huis rond beweeg. Tienuur, slaaptyd en alle ligte uit en veral waar word die laaste lig gedoof, dis mos logies waar daardie persoon hom bevind. Elke oggend sesuur word die motor uit die garage getrek. Daar is vele meer voorbeelde om te noem. Gaan kyk maar weer hoe roetine vas is jy. ‘n Laaste opmerking oor roetine: As jy elke dag dieselfde patroon volg, raak jy so afgestomp om dinge rondom jou waar te neem dat jy ook nie ‘n moontlike gevaarteken gaan raaksien nie. Het jy al by die werk gekom en skielik gewonder of jy wel jou tanne geborsel het, of jou bloeddruk pille gesluk het, of jou kind by die skool afgelaai het? Dit is roetine se krag, jy voer jou roetine soos ‘n robot uit en slaan nie ag wat rondom jou gebeur nie.

 

Die een roetine wat jy moet aanleer is om altyd seker te maak, deure en vensters is gesluit en die alarm is geaktiveer as jy een het.

Wees kreatief en breek die gevaar van roetine!

Stap 6 Mi Casa Su Casa

Is jou huis ‘n ope uitnodiging vir ‘n misdadiger om in te kom? Nie ‘n enkele woefie binne die jaart wat kan raas nie? Hekke wat oople, tuingereedskap net daar waar jy dit laaste gebruik het, of jou tuinier wat nie die tuingereedskap gebere het nie? Besef jy hoe gevaarlik en handig jou braai toerusting in die hande van ‘n misdadiger is? Of jou tuinsker wat jy sommer daar op die tafel gelos het buite op die stoep?

Of ons dit wil glo en aanvaar of nie ons moet ons huise beveilig en voorkom dat ons nie maklike teikens is nie!

Stap 7. Goedgelowigheid

Veral die skoner geslag moet hierteen waak. Moenie net jou deure oopgooi vir enige vreemdeling nie. Maak eers seker die persoon aan die anderkant van die hek of deur is die persoon wie jy dink dit is.

Pasop vir wolf in skaap klere. Ons kan nie meer net aanneem dat almal nie slegte mense is nie. Wees oplettend en waaksaam.

Laastens, gaan kyk weer hoe lyk jou sekutriteit, stap vir ‘n slag weer deur jou hele erf en kyk bietjie na swakplekke in jou sekuriteit om jouself weer te gewis van wat jy moet doen en kan doen om jouself te beveilig.

Ruik sommer terwyl jy buite is weer aan die blomme in jou tuin, Asem weer ‘n slag diep asem in en besef dat ons steeds in die beste plek op aarde bly. Ja man inplaas van om jou koffiekie voor die teevee te slurp gaan loop drink hom daar buite oppie stoep of sommer so in die stap terwyl jy sommer net stil raak en luister. 

Die oggendstond het goud in die mond

Die oggendstond het goud in die mond

Volgende keer gesels ons oor wat onskan doen om ons sekuriteit op te knap met ‘n beperkte begroting.

 

 

Lucky se blaps

Lucky, soos ek lank terug vertel het, is die straatbrak wat nie meer ‘n straatbrak is nie, hy is nou vir ‘n geruime tyd reeds deel van die familie, opgeneem en aangeneem as deel van Bloedbek se familie.

 

DSC02406

Ou Lucky is nie veel groter as ‘n tuisgebakte brood nie, maar so heldhaftig soos ‘n leeu. Bang vir niks of niemand nie.

So gebeur dit nou anner dag wat ou Lucky sy gat verskriklik wip vir ‘n kat wat buite die erf die pad kruis. Sonder aarseling storm die leeu, ek bedoel Lucky, op die kat af, maar kat se meneer staan doodstil en wag vir hom. Lucky is so ‘n meter van die kat af toe  hy besef, Kat move nie en kat is beslis nie bang nie. Hy trek sy handbrieke op, dat die roook draai, gly en tol soos ‘n rally kar  tot binne die bereik van die wagtende kat. Kat trek los en kap vir Lucky soos ‘n Mohamed Ali van ouds, links regs, links regs en voor ou Lucky tot sy sinne kom het hy ‘n paar dwarsklappe gekry wat hy nie gou sal vergeet nie.

Ou Lucky reverse, maar ai, hy word gekap, link en regs, die hare waai. Ou Lucky se geblaf, wat meer klink soos ‘n hulpkreet help niks en uiteindelik kry hy dit reg om buite die kat se bereik te skarrel en vlie om terug hek toe, sy ego is duidelik gekrenk en hy kyk nog weer so twee keer om en gee sulke halfhartige waarskuwings, sy hore hang, want hy het sy eerste fight met ‘n kat vernederend verloor.

Lucky storm die erf binne en agter die veiligheid van die hek laat loop hy weer in die kat se rigting wat klink soos “Jy was lucky, maar kom net in hierdie jaart en ek vreet jou op”. Sedertdien loop Kat sommer kortpad hier neffens ou Lucky oor die pad en Lucky seg niks meer nie, Kat knipoog vir ou Lucky en Lucky weet, Kat is nie sy maat nie.

 

Veilig op sy Duvet

Veilig op sy Duvet

Sedertdien fokus Lucky op straat varke, donkies, skape, bokke en die posman en alles wat roer voor sy jaart, behalwe kat se kind.

Lekker donderdag vir almal en hou die wiele op die teer asseblief.

 

 

 

2014….

Doring in my vlees

Doring in my vlees

Persoonlike veiligheid en sekuriteit

Ek gaan voort met die reeks oor misdaad en roof. Ou Langenhoven het mos gese, “die slimmes leer uit die dommes se foute en die dommes leer uit hulle eie foute”, of iets in der voge. Nou toe laat ons slim wees en uit ander se foute leer, meer spesifiek oor ou Bloedbek se foute… Elkeen van ons ken iemand wat al geraak is deur roof en geweldadige misdaad.

Ons is geneig om te dink dit sal nie met my gebeur nie. OF! Ons leef in die hoop dat dinge weer vinnig sal verander. SLEGTE NUUS! Dit gaan nie. Wereld wyd verskerp misdaad en geweld weens verkeie redes. Hier by ons kan ek nie sien hoe dit anders gaan wees nie. Verby is die dae van huise sonder diefwering en derglike voorkomende toerusting.

Ek wil nie ligtelik oor die saak praat nie, want dit raak soveel mense, om nie eens te praat oor die trauma wat daarmee gepaard gaan nie.

Ek wil ‘n onderskeid tref tussen die situasie in stede en die platteland. Ek dink die stedelinge is reeds ver gevorder om hulself voor te berei en die nodige maatreels te tref vir voorkoming van misdaad en roof. Op die platteland is dit ‘n totaal ander storie en juis daaroor wil ek my hoofsaaklik toespits op die platteland.

Wie teiken ‘n misdadiger, hoofsaaklik ‘n maklike prooi. Die verdomde barbare is te lafhartig om ‘n plek of persoon te teiken wat gereed is vir ‘n moontlike aanval.

Laat ek eers met julle ou Bloedbek se geval bespreek. Wat het dan verkeerd gegaan? Blote slapgatgeit seg ek julle.

Sondag middag ou Bloedbek se pensie is lekker vol skaaptjops en malva poeding. Ek en Liefie betrek die katel net om die magies te laat sak. Mensig skaars slaan my kop die kussing en die honde begin aan die voorkant te raas, ek vlieg op en gaan maak hulle stil, sonder om te kyk wat rerig die rede vir hulle geblaf is. Die derde keer toe ek opvlie was dit ‘n ander storie. Toe ek my kop om die kamerdeur druk sien ek vir Ta  van die anderkant van die gang afsluip, gewapen met my braai se vuuryster, ‘n soliede stuk yster om die kole te roer, reg vir slaan. Omdraai om my te bewapen kan ek nie, hy is byna by die kamer waar my dogters is. Aanval is al wat oorbly. Ek weet nie wie die grootstste geskrik het ek of hy nie, maar as jy vir ou bloedbek net in sy Ptbroek sien sal enige mens skrik en nagmerries kry. Ek val aan, soos ek laas nog in die vorige eeu met rugby gedoen het. Ons is altwee byna gelyk by die kombuis se ingang en op daardie stadium vang my oog nog twee gevrete, besig om my yskas uit te pak. Gelukkig op die plankvloere klink voetstappe soos ‘n opmars, om nie eens te praat hoe dit sal klink as ou Bloedbek storm nie. Weet julle hoe lyk dit as drie pikstele gelyk by ‘n deur wil uitstorm? Wel hulle is al drie gelyk by die agterdeur uit. Hulle het duidelik nie teenstand verwag nie. Beloon met ‘n paar vieslike kneusplakke het ek een gevang. Dit was een adder wat reeds op borgtog uit was vir huisbraak. Hy kry 3 jaar, maar is na ‘n jaar weer op vrye voet. Intussen is hy weer gevang vir huisbraak en die storie gaan hom bloot herhaal. Alhoewel die polisie redelik vinnig op die toeneel was, kan ons nie veel pyl trek op ons regsstelsel nie.

Ek was gelukkig net ‘n paar blou kolle, MAAR wat het ek verkeerd gedoen?

1. My agterdeur was nie gesluit nie, ons bly mos in die platteland, waar almal vir almal ken. Misdaad gebeur nie hier nie.

2. Ek het ‘n baie gevaarlike wapen tot sy beskikking gestel deur nie enige item wat as wapen gebruik kan word, te bere nie.

3. Ek het in hulle strik getrap. Hou die honde voor besig en die res gaan doen hulle ding agter. Groot fout.

4. Wees bedag wanneer jou honde blaf, dit is nie om dowe neute nie.

Moet nooit dink jy sal nie deel van die statistiek word nie, ek het baie lig daarvan afgekom.

Kom ons leer uit mekaar se foute en wees voorbereid.

Volgende week praat ek verder oor ons veiligheid…

Seg Bloedbek

PS Ek is nie ‘n misdaad kundige nie, ek praat bloot uit my persoonlike ondervinding en natuurlik is ek ook besig om bietjie navorsing te doen om meer kundig te raak. Sonder om paranoies te klink, dalk is “one bullet one settler” genoeg rede om meer paraat te wees.

WAARSKUWING!

Onse mense is darem kreatief, wonder waar het ek die “one bullet” storie die eerste keer gehoor? Hierdie is die aangepaste weergawe.

waarskuwing

Ek is ‘n miljoener!!

My email en selfoon ry lekker op die gravy train!

My selfoon het al miljoene geerf van afgestorwe familie lede wat ek nie ken nie. Ek kon al miljoene ontvang het uit kontant vanaf Irak. As ek wou kon ek ‘n weeskind van Timbaktu se erf porsie bele en as enigiste erfgenaam van ‘n familie lid, wat ek nie ken nie, wat dood is se erflating van miljoene geerwe het.  Die lys gaan aan en aan. Miljarde seg ek jou.

Vandag het die United Nations weereens ‘n vet bedrag aangebied. Man dis lekker om net te ontvang.

Ai hoe spyt is ek darem nou.

Ek kon sommer ou Zumpies se Nkandla vir hom gebou het, dan was hy nie in sulke groot verleentheid nie en sommer tannie Madonsella ‘n groot klomp probleme gespaar.

Vir ou vader krismis , dis nou Juliusssie, ag shame, vir hom sou ek sy tax betaal het en vir hom ‘n graad gekoop het op die web, dan sou hy dalk nie soveel gespot word nie. Het hy en sy bediendes nie pragtig gelyk in die parlement gister nie, reg vir “werk”. Eish my tuin kort ‘n regruk.

Maar, as julle my nie glo nie hier is die bewys. Ek is seker dat die United nations nie sal omgee as ons almal sommer die geleentheid aangryp om te skep nie, dis mos aan al die email gebruikers gerig. Wonner nou net waar gaan hulle al die geldtjies kry as ons almal die aanbod aanvaar.

United nations

 

 

 

 

 

 

%d bloggers like this: